blog

ຄູ່ມືການເຮັດບຸນ

Sat, 01 Aug 2009 14:48:19 +0100

ຂໍ້ແນະນຳວິທີໃຊ້ໃນງານບຸນຕ່າງໆ
I. ໃນເວລາເຮັດບຸນເຮືອນນັ້ນເພື່ອມັນເປັນສິລິມຸງຄຸນ (ເອີ້ນວ່າ ສູດມົນ) ສູດມຸງຄຸນເຮືອນໃນຕອນແລງ
ເມື່ອໄດ້ນິມົນພຣະສົງສາມະເນນມາຮອດເຮືອນຂອງຕົນແລ້ວກໍ່ຈັດສິ່ງຂອງຕ່າງໆເຂົ້າເຄນເພີ່ນເຊັ່ນ:
ຄຳໝາກ, ກອກຢາ, ກັບໄຟ, ຜ້າເຊັດມື,ນ້ຳດື່ມບໍລິສຸດ, ນ້ຳຫວານແລະງຽ້ງຢ່າງຮຽບຮ້ອຍແລ້ວນັ້ນ
ສີລະວັດ(ຄົນນຳພາໄຫວ້ພຣະຫຼືຖວາຍຂອງທານ) ແລະເຈົ້າສັດທາພ້ອມທັງຍາດພີ່ນ້ອງທີ່ມາຮ່ວມໃນ
ງານບຸນນັ້ນກໍ່ເລີ່ມເຮັດພິທີໄຫວ້ພຣະ ໃນເບື້ອງຕົ້ນໂດຍຫຍໍ້,ເຊີ່ງສີລະວັດນຳພາເວົ້າຕາມບົດສູດລຸ່ມນີ້
1. ຄຳບູຊາດອກໄມ້ທູບທຽນ(ເບີ່ງໜ້າຕໍ່່ໄປ)
2.ຄຳໄຫວ້ພຣະລັດຕະນະໄຕ(ອາລະຫັງ)
3.ຄຳໄຫວ້ພຣະພຸດທະເຈົ້າ :ວ່ານະໂມ 3 ຈົບ()
4.ຄຳໄຫວ້ພຣະໄຕສະລະນະຄົມ(ພຸດທັງ)
5.ວັນທາຄຳໄຫວ້ພຣະເຈດີສາຣິກະທາດຕົ້ນສີມະຫາໂພພຣະພຸດທະຮູບເປັນຕົ້ນ(ວັນທາໃຫຍ່).
6. ວັນທາຂໍພອນ(ວັນທານ້ອຍ)
7 .ປ່າວສັກເຄເທວະດາ(ຄຳເຊີນເທວະດາ)
8.ຫຼັງຈາກນັ້ນກໍ່ອາລາທະນາສິນ 5 ປະການ ,ເມື່ອພຣະສົງໃຫ້ສິນຈົບແລ້ວກໍ່ວ່າ
9.ອາລາດທະນາມຸງຄຸນ,ເມື່ອພຣະສົງສູດມຸງຄຸນຈົບແລ້ວ
10.ໃຫ້ອາລາດທະນາເທດ,ເມື່ອພຣະສົງເທດຈົບແລ້ວໃຫ້ວ່າ
11.ຄຳຖວາຍສັງຄະທານ,ເມື່ອຖວາຍຈົບແລ້ວ
12.ໃຫ້ຄາລະວະຫຼື້ ກາເຍ 3 ຈົບ
13.ພຣະສົງ ຍະຖາສັບພີໃຫ້ພອນຢາດນ້ຳອິມີນາ
14.ໃນເວລານັ້ນເຈົ້າສັດທາ ລວມທັງຍາດພີ່ນ້ອງ ແລະ ຊາວບ້ານອອ້ມຂ້າງທີ່ມາຮ່ວມງານບູນກໍ່ພາ
ກັນຢາດນ້ຳຂອງໃຜລາວ.
15.ສ່ວນຕອນກາງຄືນມື້ຕັ້ງບຸນນັ້ນ ແມ່ນຈະມີການຄົບງັນຕາມປະເພນີ
II. ຕອນເຊົ້າມື້ລຸນມານັ້ນ ກໍ່ມີການຈັດພິທີຕັກບາດ ແລະ ຖວາຍສັງຄະທານຢູ່
ເຮືອນຂອງເຈົ້າສັດທາ
ເມື່ອວ່າພຣະສົງສາມະເນນມາຮອດເຮືອນບຸນຢ່າງຄົບຖ້ວນແລ້ວນັ້ນກໍ່ໃຫ້ມີການເຄນສິ່ງຂອງຕ່າງໆ
ເຊັ່ນ:ຄຳໝາກ, ກອກຢາ,ກັບໄຟ,ຜ້າເຊັດມື, ນ້ຳດື່ມບໍລິສຸດ, ນ້ຳຫວານແລະງຽ້ງຢ່າງຮຽບຮ້ອຍແລ້ວ
ນັ້ນ ເມື່ອເຈົ້າສັດທາພ້ອມດ້ວຍຍາດຕິພີ່ນ້ອງມາກັນຄົບຖ້ວນແລ້ວ ກໍ່ໄຫວ້ພຣະຮັບສິນເສຍກ່ອນໃຫ້
ປະຕິບັດຕາມຂັ້ນຕອນຂ້າງເທີງນັ້ນລະ
1. ຄຳບູຊາດອກໄມ້ທູບທຽນ(ເບີ່ງໜ້າຕໍ່່ໄປ)
2.ຄຳໄຫວ້ພຣະລັດຕະນະໄຕ(ອາລະຫັງ)
3.ຄຳໄຫວ້ພຣະພຸດທະເຈົ້າ :ວ່ານະໂມ 3 ຈົບ()
4.ຄຳໄຫວ້ພຣະໄຕສະລະນະຄົມ(ພຸດທັງ)
5.ວັນທາຄຳໄຫວ້ພຣະເຈດີສາຣິກະທາດຕົ້ນສີມະຫາໂພພຣະພຸດທະຮູບເປັນຕົ້ນ(ວັນທາໃຫຍ່).
6. ວັນທາຂໍພອນ(ວັນທານ້ອຍ)
7 .ປ່າວສັກເຄເທວະດາ(ຄຳເຊີນເທວະດາ)
8.ຫຼັງຈາກນັ້ນກໍ່ອາລາທະນາສິນ 5 ປະການ ,ເມື່ອພຣະສົງໃຫ້ສິນຈົບແລ້ວກໍ່ວ່າ
9.ພຣະສົງສູດບາດຄື(ສູດພະຫຸງແລະອິຕິປິໂສ)
10.ອອກຕົນຍາດໂຍມກຽມຕັກບາດ
11.ແລ້ວຖວາຍສັງຄະທານແລະຖວາຍພາເຂົ້າແລະພັດຕາຫານ
12.ຫຼັງຈາກນັ້ນກໍ່ເຄນພາເຂົ້າແລະອາຫານຕ່າງໆ
13.ພຣະສົງສາມະເນນກໍ່ສັນເຂົ້າ(ກິນເຂົ້າ) ເປັນທີ່ຮຽບຮ້ອຍແລ້ວນັ້ນ
14.ຖ້າຈະຟັງທຳກໍ່ໃຫ້ອາລາດທະນາເທດ.ຖ້າຫາກບໍ່ມີຟັງເທດກໍ່ເຂົ້າສູ່ພິທີຄາລະວະ ກາເຍ ຕໍ່ໄປ
15.ຫຼັງຈາກນັ້ນພຣະສົງຍະຖາສັບພີໃຫ້ພອນຢາດນ້ຳເວລານັ້ນເຈົ້າສັດທາຍາດຕິພີ່ນ້ອງແລະຊາວ
ບ້ານອອ້ມຂ້າງທີ່ມາຮ່ວມງານບຸນເຮືອນກໍ່ພາກັນຢາດນ້ຳຂອງໃຜລາວ ຈາກນັ້ນເອົາເປັນວ່າຈົບພິ
ງານບຸນເຮືອນແລະພິທີທາງສາສະໜາ ສ່ວນເຈົ້າສັດທາກໍ່ເຊີນແຂກ ຮັບປະທານອາຫານຕາມອັດ
ຕະຍາໄສ.ຕ່າງຄົນຕ່າງແຍກຍ້າຍກັນໄປຫຼັງຈາກຮັບປະທານອາຫານ

ຮີດຄອງປະເພນີ

Sat, 12 Sep 2009 10:18:26 +0100

ວັນອອກພັນສາ

Wed, 21 Oct 2009 01:59:51 +0100

ກ. ວັນປະວໍຣະນາ ແລະວັນພຣະເຈົ້າເປີດໂລກ:

- ເທດສະການເຂົ້າພັນສາ ຈຳເດີມແຕ່ວັນຂຶ້ນ ໑໕ ຄ່ຳເດືອນ ໘ ຈົນມາຮອດວັນນີ້ ຄືຂຶ້ນ ໑໕ ຄ່ຳ ເດືອນ ໑໑ ພໍດີຄົບຮອບ ໙໐ ວັນພໍດີ, ແຕ່ວັນນີ້ ກຳນົດວ່າ ເປັນວັນປາວໍຣະນາຂອງພຣະສົງ ຫຼືຈະຮຽກວ່າວັນ "ສັງຄະປະວໍຣະນາ" ວັນນີ້ ເວລາ ໑໔:໐໐ ໂມງ, ຄະນະພຣະສົງລາວທົ່ວປະເທດ ຈະທຳສັງຄະປາວໍຣະ ນາກັນທົ່ວເທດ, ບາງວັດບາງແຂວງ ໃນທົ່ວປະເທດນັ້ນ ຈະທຳ ປະວໍຣະນາ ກັນໃນວັດໃຜວັດລາວ, ໂດຍສະເພາະໃນນະຄອນຫຼວງວຽງຈັນ ຈະທຳ "ມະຫາ ສັງຄະປະວໍຣະນາ" ເພາະຄະນະສົງໃນເຂດ (ຕາແສງຂອງຕົນ) ຈະລວມກັນທຳສັງຄະປະວໍຣະນາໃນວັດຫຼວງ ຫຼືວັດສຳຄັນໃນຕາແສງນັ້ນ ສຳລັບເມືອງໄຊ ເສດຖາ ນະຄອນຫຼວງວຽງຈັນ ສະເພາະເຂດທາດຫຼວງ, ນາໄຊ, ໂພນທັນ ຈະລວມທຳສັງຄະກັມ ອັນເປັນກິດຂອງສົງທີ່ຂາດເສັຍບໍ່ໄດ້ ທີ່ວັດພຣະທາດ ຫຼວງເໜືອ (ວັນນີ້ພຣະເດດ ພຣະຄຸນພຣະອຈານໃຫຍ່ ດຣ. ມະຫາວິຈິດບໍ່ໄດ້ລົງຮ່ວມ ເໝືອນທີ່ຜ່ານມາ ເພາະທ່ານອາພາດ ຍາດໂຍມທີ່ຮັກແພງ ເພີ່ນ ສາມາດຕິດຕໍ່ໄປຖາມຂ່າວເພິ່ນໄດ້ທີ່ສຳນັກອົງການ ອ.ພ.ສ ເລີຍ) ໃນວັນນີ້ ພຣະເຖຣານຸເຖຣະຈຳນວນ ໃນ ໓ ເຂດ ມີ ໒໖໑ ອົງເຂົ້າຮ່ວມ, ຄຳວ່າ ປະວໍຣະນາ ມາຈາກ ຄຳປາລີວ່າ ປະວາຣະນາ ແປວ່າ ອະນຸຍາດ ຫຼືຍອມໃຫ້, (ອະທິບາຍວ່າ ພຣະສົງຈະປະວາຣະນາຕໍ່ກັນວ່າ ມີເຫດການແນວໃດ ພຣະສົງຈະອະນຸຍາດໃຫ້ພຣະສົງອົງອື່ນ ເວົ້າວ່າບອກສອນ ຫຼືບອກກ່າວກັນໄດ້ ໂດຍບໍ່ຖືໂກດ, ຫຼືປະວາຣະນາໃຫ້ຮຽກເອີ້ນ ໃຫ້ສອຍ ຫຼືທຳກິດອື່ນໃດ ໃນພຣະທັມມະວິໄນໄດ້.

ຂ. ວັນອອກພັນສາ:
- ວັນອອກພັນສານັ້ນ ກໍນັບແຕ່ວັນເຂົ້າພັນສາມາ ຄື ແຕ່ແຮມ ໑ ຄ່ຳ ເດືອນ ໑໑, ຈົນຮອດວັນ ແຮມ ໑ ຄ່ຳ ເດືອນ ໑໑ ກໍພດີຄົບ ໓ ເດືອນນ ຫຼື ໙໐ ວັນພໍດີ, ວັນນີ້ ກໍກ່ຽວເນື່ອງກັນກັບວັນເຂົ້າພັນສາ ຕາມພຣະວິໄນແມ່ນກຳນົດ ໃຫ້ພຣະສົງເຂົ້າຈຳພັນສາຄົບໄປໄຕມາດ ເມື່ອມາເຖິງກຳນົດເຂດອອກ ກໍອອກຕາມການກຳນົດ ຄືກຳນົດລະດູຝົນ, ເມື່ອມາເຖິງວັນແຮມ ໑ ຄ່ຳຂອງວັນປະາຣະນາແລ້ວ ພຣະສົງກໍທຳສັງຄະກັມ ຄືທຳປະວາຣະນາແທນ ອຸໂປສົດ, ແລ້ວພຣະສົງກໍກ່າວຕັກເຕືອນກັນ ແລ້ວກໍພຣະຜູ້ນ້ອຍ ຜູ້ໃຫຍ່ກໍອະນຸຍາດໃຫ້ມີການຕັກເຕືອນກັນ ໂດຍບໍ່ຖືຄວາມຜິດ.
- ສຳລັບຄຳກ່າວອອກພັນສາ ແລະປະວໍຣະນານັ້ນ ວ່າດັ່ງນີ້ "ສັງຄັມ ພັນເຕ ປະວາເຣມິ ທິຕເຖນະ ວາ ສຸເຕນະ ວາ ປະຣິສັງກາຍະ ວາ ວະທັນຕຸມັງ ອາຍັສມັນໂຕ ອະນຸກັມປັງ ອຸປາທາຍະ ປັສສັນໂຕ ປະຕິກກະຣິສສາມິ" (ວ່າສາມຫົນ) ແປເປັນພາສາລາວ ມີຄວາມໝາຍວ່າ "ຂ້າແຕ່ສົງຜູ້ຈະເຣີນ ຂ້ານ້ອຍຂໍປະວາຣະນາຕໍ່ສົງ ດ້ວຍໄດ້ເຫັນຫຼືໄດ້ຟັງກໍຕາມ ຂໍທ່ານທັງຫຼາຍໂຜດອະນຸເຄາະ ວ່າກ່າວຕັກເຕືອນຂ້ານ້ອຍດ້ວຍ ເມື່ອຂ້ານ້ອຍມອງເຫັນແລ້ວ ຈະປະພືດຕົວໃໝ່ໃຫ້ດີ".
- ທັງນີ້ ການອອກພັນສາແລ້ວ ພຣະສົງຈະເດີນທາງໄປທິດທາງໃດກໍໄດ້ດັ່ງໃຈປາຖະໜາ ຫຼືຄ້າງຄືນທີ່ອື່ນໂດຍບໍ່ຜິດພຸດທະບັນຍັດ ແລະຍັງໄດ້ຮັບອະນິສົງ ກໍຄື:
໑. ໄປໃສມາໃສບໍ່ຕ້ອງບອກລາຄະນະສົງກໍໄດ້.
໒. ບໍ່ຕ້ອງຖືຜ້າໄກໄປຄົບຊຸດກໍໄດ້ (ປົກກະຕິພຣະມີຜ້າສາມຜືນ ຫາກຈຳພັນສາຄົບສາມເດືອນອະນຸຍາດໃຫ້ໄປຄ້າງຄືນທີ່ອື່ນ ບໍ່ຄົບສາມຜືນກໍໄດ້)
໓. ມີສິດຮັບອະຕິເຣກະລາບອັນເກີດຂຶ້ນຖ່າມກາງສົງໄດ້ ສະເໝີສົງທັງປວງ.

ຄ. ປະເພນີກ່ຽວຂ້ອງກັບວັນອອກພັນສາ.
- ວັນເທໂວໂຣຫະນະ(ວັນພຣະພຸດທະເຈົ້າສະເດັດຈາກຕາວະຕິງສາສະຫວັນ)
- ວັນນີ້ຕາມຕຳນານ ແລະພຸດທະປະວັດ ປະກົງກັບວັນເທໂວໂລຫະນະ ຫຼືວ່າວັນພຣະເຈົ້າເປີດໂລກນຳ ເຊິ່ງເປັນວັນທີ່ພຣະພຸດທະເຈົ້າ ຂອງເຮົາໄດ້ສະເດັດຂຶ້ນໄປ ເທດສະໜາໂຜດພຸດທະມານດາ ທີ່ສະຫວັນຊັ້ນຕາວະຕິງສາເທວະໂລກ ເພື່ອໂຜດສີຣິມະຫາມາຍາເທວະບຸດ ຄືພຸດທະມານດາ ໂດຍການສະແດງ ອະພິທັມ ໗ ຄຳພີ, ພໍພຣະພຸດທະອົງໄດ້ເທດສະໜາຈົບລົງ ແລະຕ້ອນຮັບປະຕິສັນຖານເຫຼົ່າເທບ ມີພຣະຍາອິນ ແລະພຣະຍາພຣົມ ແລະອະຣິຍະເມດໄຕເທວະບຸດ ຮຽບຮ້ອຍແລ້ວ ກໍສະເດັດກັບມາຍັງເມືອງມະນຸດຄືນ ພໍດີກົງກັບວັນຂຶ້ນ ໑ ຄ່ຳເ ເດືອນ ໑໑ ພໍດີ, ວັນນີ້ ເປັນວັນທີ່ສະຫວັນ, ມະນຸດ ແລະນະຣົກມອງເຫັນກັນດ້ວຍ ຈຶ່ງມີຊື່ອີກຢ່າງໜຶ່ງວ່າ "ວັນພຣະເຈົ້າເປີດໂລກ", ຊາວພຸດທັງຫຼາຍຈຶ່ງນິຍົມຕັກບາດຖວາຍ ສັງຄະທານໃນວັນຕັກບາດ.

ງ. ວັນໄຫຼເຮືອໄຟ.
- ເປັນວັນໄຫຼເຮືອໄຟ ເພື່ອບູຊາຄຸນນ້ຳ ແລະຄຸນພະຍານາກ ທີ່ລາວນັ້ນແມ່ນເຮັດທຸກໆວັດ ທີ່ວຽງຈັນ ໄຫຼທີ່ທ່າວຽງຈັນ, ທີ່ທ່າແຂກ, ທີ່ສະຫວັນ, ທີ່ປາກເຊ ແມ່ນ້ຳຂອງ ແລະເຊໂດນ, ທີ່ເມືອງຈຳປາສັກ ແລະສີພັນດອນແມ່ນເຮັດກັນທຸກໆບ້ານ, ທີ່ຫຼວງພຣະບາງ ແລະເມືອງອື່ນໆ ກໍອີງຕາມສະຖານທີ່ເມືອງຂອງ ຕົນ.

ຈ. ວັນຊ່ວງເຮືອ ເປັນປະເພນີລາວ ທີ່ທຳກັນມາແຕ່ບູຮານະການ, ສະນັ້ນວັນ ໑ ຄ່ຳ ເຊິ່ງເປັນກົງກັບວັນອອກພັນສາ ທີ່ວຽງຈັນຊ່ວງເຮືອທີ່ທ່າວັດຈັນ, ທີ່ປາກເຊ ທີ່ແມ່ນ້ຳເຊໂດນ ແລະທີ່ຫຼວງນ້ຳທາ ແມ່ນຊ່ວງກັນທີ່ນ້ຳທາ.

ສ. ຖວາຍຜ້າຈຳນຳພັນສາ ຄືຍາດໂຍມນິຍົມເອົາຜ້າໄກ ໄກຖວາຍພຣະສົງ ຕາມສັດທາ ແລະນັບຈາກແຮມ ໑ ຄ່ຳເປັນຕົ້ນໄປ ແມ່ນເຂດກະຖິນ ຈະມີການ ທອດກະຖິນໄປຈົນຮອດເດືອນ ໑໒ ເພັງ(ກົງກັບວັນຕັກບາດບຸນນະມັດສະການພຣະທາດຫຼວງ ໝົດເຂດກະຖິນ.
- ເທົ່າທີ່ຮູ້ແລ້ວວ່າ ວັດຕ່າງໆ ທີ່ຈະມີການທອດຖວາຍຜ້າກະຖິນ ຄື.
໑. ຍາມທ່ານໃຫຍ່ບຸນທອງ ວິປະໄຊ (ພຣະອາຈານຊາໂງນ ຈະນຳກະຖິນໄປທອດທີ່ເມືອງໂຂງ ຖ້າໃຜຢາກໄປຮ່ວມບຸນນຳທ່ານ ກໍຕິດຕໍ່ທ່ານທີ່ວັດນາຄູນ ນ້ອຍ) ອອກເດີນທາງ ວັນທີ ໒໖/໑໐/໐໙
໒. ພຣະອາຈານຖາວອນ ວັດພຣະທາດຫຼວງເໜືອ ຈະນຳກະຖິນໄປທອດທີ່ວັດພູສະເຫຼົ້າ ເມືອງປາກເຊ (ອອກເດີນທາງ ວັນທີ ໒໔/໑໐/໐໙)
໓. ວັດຮ່ອງແກ ເມືອງໄຊເຊດຖາ ຈະທອດຖວາຍຜ້າກະຖິນວັນທີ ໒໔/໑໐/໐໙.
໔. ວັດວຽງຈະເລີນ ເມືອງໄຊເຊດຖາ ຈະທອດຖວາຍຜ້າກະຖິນວັນທີ ໒໔/໑໐/໐໙.
- ທ່ານໃດ ຈະຮ່ວມບຸນກໍອະນຸໂມທະນາ ແລະຕິດຕໍ່ຕາມນັ້ນ ຫຼືມີບຸນກະຖິນວັດໃດ ທີ່ຮູ້ຂ່າວຈະເອົາມາອັບເດດໃຫ້ທ່ານຊາບຕໍ່ໄປ ເພື່ອໄດ້ໄດ້ ອະນຸໂມທະ ນາສາທຸ ນຳກັນ

ວັນເຂົ້າພັນສາ

Sun, 05 Jul 2009 05:36:07 +0100

ຄະຕິທຳແລະທຳມະບັນຍາຍ

Fri, 03 Jul 2009 14:56:28 +0100